Communicatu di u 5 di Dicembre

Dopu à a malamorte d’Emiliu Cortichiato, u Cumitatu Contr’à a Ripressione (CAR) s’interrugheghja annantu à l’azzione di u sgiò mere di Santa Maria Sichè. Hà dumandatu u mere di fà caccià u marmaru sculpitu è spostu, u ghjornu di l’intarru, annatu à a tomba di u nostru fratellu di fede.

Saria un disturbu tamantu pà u giacubinisimu di certi elletti stu pezzu di petra scrittu, simbolu di a resistenza è chì testimuneghja di u patrotisimu di stu giuvanottu ? O allora ùn saria chè vigliacchezza è sottumissione à l’ordini vinuti da Parigi ?

Ùn pudemu stà zitti davant’à st’altra prova di disprezzu chì ùn rispetta micca a pena tamanta è u dolu di a famiglia è chì ùn rispetta a sepultura sacrata induve riposa ab eternu l’anima  di un giovanu corsu. Certi li rimpruvereghjanu l’amore sacru di a Patria, ancu dopu à a morte...

Ci vole à aspittassi, magaru, à ciò ch’elli fessinu caccià quelle di Sampieru in Bastelica, di Paoli in Corti,  quella di u Ponte Novu e tanti altri…

O Corsi, omi fieri chè vo site, omi di a tradizione storica di u santu rispettu di i morti, hè vinuta l’ora di discità e vostre cuscenze è di dì innò ! ùn ci vole micca à lascialli fà, ùn avemu micca u dirittu di lascialli fà...

A morte hè sacra, ci vole à rispittalla, è a faremu rispittà.

Testu scrittu è lettu da Ghjuvan Maria Poli à l’intarru di Emiliu Corticchiato.

Di la noscia tarra cunniscia u sudori,
Di la noscia tarra ogni ghjornu ni purtavi i valori,
Di la noscia tarra in ogni sponda suminai tanti fiori,
Di la noscia tarra sapii sparghja u so amori.

A to vita campagnola di duru stanta,
Avia fattu u to esse, d’amicizia è di fedeltà,
Di stintu corsu, di rispettu, d’onori è di fraternità,
Cusì era la to via arrdicata à una cumuna vulintà.

Pà a to ghjenti ni suniavi tanti stondi di felicità,
Pà u to populu ni spiravi tantu destinu di benistà,
Pà u to paesi tanti malanni à sfrancà,
Pà i to frateddi tanta lotta à cuntinuà.

Sta sera in u cellu taravesu una stedda si spinghjarà,
U dulori di u to addiu, hè una ferita chì mai ùn si piantarà
Ma dumani, à u spuntà di l’alba, u to ricordu schjarisciarà
A strada fiurita di u nostru bisognu à marchjà.

Emiliu, hè ghjuntu u gattivu tempu di u spicà,
In a furesta si pò senta, cum’è un silenziu chì và,
È porta u nosciu dolu è a noscia tristezza à ricamà,
È dici chì per sempri, a to mimoria in noi camperà.