U 5 di dicembre di u 2006 : A data officiale di a "Festa di a Nazione" ghjè l'8 dicembre, l'associu di a cità di Conca "A Punta di l'Ortu" s'appronta à celebralla è à festighjalla u sabbatu 9 dicembre.

Per l'occasione l'associu hà da piazzà una grande bandera corsa nant'à a facciata sudu di a Punta Calcina, chì supranieghja u mare. A bandera corsa si vederà da luntanu è da quì à pocu serà illuminata. L'associu "A Punta di l'Ortu" mantene a tradizione inalzendu a bandera à testa di Moru, nant'à stu situ, per rispettu pè a storia è a memoria di l'anziani.

Duie cunfraterne sò state invitate à participà à sta festa u 9 dicembre, quella di Santa Croce di Purtivechju è quella di Patrimoniu. Sò cunviate à a messa è à a prucessiò di l'Immaculata Cuncezzione à parte da 7 ore di sera, cù a participazione di u core Santu Stefanu di Conca.

Tutti i participanti sò invitati à una veghja tradiziunale ingiru à a pulenda, brocciu, figatellu è panzetta à parte da 8 ore è mezu di sera. Canti, chitarre, viulini è artisti di u circondu accumpagneranu sta veghja.